Plantun de Prouvènço

Pèr coumpara dos planto d'encò nostre

Potentilla neglecta & Scleranthus annuus

Potentilla neglecta

Rosaceae

Nom en français : Potentille négligée.

Descripcioun :
Lou fragoun-neglegi es uno planto que sèmblo forço au fragoun-argenta Potentilla argentea e souvènt discouneigu au nostre. D'efèt èi bèn dre e cubert de péu blanc aleva lou dessubre di fueio. Se destrìo de soun cousin majamen emé si fueio di cinq partido facho de forço dènt (9 à 33) sarrado (fotò). Li péu podon èstre eici long de mai de 0,5 mm o crespu. Coumpara emé lou fragoun-argenta que ié sèmblo proun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 60 cm
Fueio : alterno
Tipe bioulougico : Emicriptoufite
Cicle bioulougico : Planto renadivo

Gènre : Potentilla
Famiho : Rosaceae

Ordre : Rosales

Coulour de la flour : Jauno
Petalo : 5
Ø (o loungour) flour : 9 à 12 mm
Flourido : Printèms - Estiéu

Sòu : Si
Autour basso e auto : 0 à 2200 m
Aparado : Noun

Liò : Tepiero sablouso - Roucaio - Terraire safrous
Estànci : Subremediterran à Subaupen
Couroulougi : Éurasiatico
Ref. sc. : Potentilla neglecta Baumg., 1816

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.